مربى البرتقال و التفاح

من بعد ما تسالا ليا المربى ديال ماما، كانتشهى مرة مرة هاديك اللمسة الحلوة مع مذاق الفاكهة فوق شريحة الخبز الكامل ديال الفطور، لكن المربى للي في الأسواق كايجيني حلو بزااااف.

جربت نصايبو بالبرتقال و التفاح فيه 6٪ فقط ديال السكر.

طبعا مدة الحفظ غادي تكون أقل بالمقارنة مع المربى العادي لكن مادرتش كمية كبيرة باش ناكلو مازال طري ههههه

الطريقة جد سهلة. 
غسلت البرتقال، قشرتو و قطعتو مكعبات صغيرة. 
غسلت جوج تفاحات و قشرتهم و قطعتهم مكعبات صغيرة
خديت برتقالة مغسولة مزيان و حكيت ليها القشرة بالحكاكة الرقيقة و زدتهم مع الفواكه.
الفواكه للي عندي اعطتني تقريبا 860 غرام
زدت عليهم 50 غرام ديال السكر
عصير نصف حامضة 
غطيت الخليط و خليتهم شي ساعة حتى طلقو شوية الماء ديالهم. 
على نار هادئة درت خليط الفواكه و السكر يطيب مع التحريك مرة مرة باش مايلسقش لتحت. 
في نفس الوقت قمت بتعقيم القرعة للي غادي ندير فيها المربى، غسلتها بالماء والخل الأبيض و درتها في ماء يغلي وخليتها فوق النار بضع دقائق.
بان ليا المربى طاب، طفيت عليه النار و زدت ملعقة صغيرة من العسل و حركت مزيان.
خليتو برد شوية و طحنتو بالميكسور و درتو في القرعة. 

لذيذ بزاف و مذاق الفواكه حاضر بقوة 😍💚