واش بصح الوقت يداوي كل شيء

الوقت يداوي كل شيء

كثيرا ما كانسمع مقولة الوقت يداوي كلشي، ملي كايجي شي واحد يواسيك فشي محنة و مايلقى مايقولك كايجبد ليك هاد الجملة و كايقولك اصبر هي فقط مسألة وقت
ولكن الناس للي عايشين نفس داكشي للي كاتعيش انت نادرا ما يستعملون مثل هذه الجمل، حيت هوما اكتر وحدين عارفين الحقيقة
حقيقة ان الوقت ماشي دواء، الوقت كايزيد يحسسك بحجم الفقد كلما داز الوقت كاتزيد تحس بالتغيير للي طرأ على حياتك و بمرارة الايام بعد هاد التغيير

الوقت كايخليك تشوف أن الحياة ممكن تتغير في رمشة عين و كايخليك تعيش وسط الذكريات و يبين ليك أنك عمرك ماتعاود تعيشهم. ممكن تكون هدي هي قوة الوقت كايخليك تشوف حقيقة الحياة و قساوتها و بأنك لازم تتأقلم مع الوضع

ماتسناش شي واحد يعلمك وقتاش ولا كيفاش تتأقلم مع الوضع، حتى واحد ماعارف احتياجاتك ولا باش كاتشعر انت الوحيد للي غادي تحس براسك واش قادر تنوض و توقف على رجليك واش قادر تشوف الحياة بالمنظور الجديد بعد كل التغيرات انت الوحيد للي ممكن تحدد كل هاد المعطيات للي يخليوك تعرف واش بديتي مرحلة التأقلم و تقبل الحياة و الروتين الجديد ولا مازال
من تجربتي الخاصة اقتنعت ان الوقت يداوي فقط الجروح الجسدية وللي حتى هي خاصها دواء ورعاية إلى جانب الوقت باش ماتكونش مضاعفات و باش ماتخليش ندبات
Cicatrices
جروحك النفسية و العاطفية محتاجة رعاية حتى هي، كيفاش؟ ماعرفتش
ماكايناش وصفة سحرية. دير الحاجات للي كاترتاح فيهم و للي كايعجبوك، ماتخلي حتى واحد يقلل منك ولا يقولك انك ماكادير والو باش تخرج من هاد الحالة للي انت فيها، اسمح للناس الإيجابيين يدخلو في حياتك اليومية، اقرأ بزاف ديال الكتب ماشي ضاروري يكونو ديال مفكرين و فلاسفة اي كتاب يخليك تعيش مع الشخصيات للي فيه، تفرج في فيديوهات ديال ناس عاشو أوقات عصيبة و عرفو يخرجو منها، تفرج حتى في مسلسلات او برامج ترفيهية باش تعطي لعقلك فرصة فين يهرب من الصغط و التفكير، دير موسيقى هادئة وركز على التنفس ديالك فقط، خود تليفونك و اتصل بصديق و هضر معاه وضحكو على ذكرياتكم الجميلة، اخرج تمشى تحت أشعة الشمس...
هادشي كامل خاصو طاقة و خاصو إرادة باش تقدر ديرو، حيت شي مرات كايكون صعيب عليك حتى أنك تخرج من فراشك و تشوف الناس، المهم هو عدم الاستسلام و تبقى دايما تحاول