أحبوا بعضكم بعضا، الحياة قاسية جدا

كاين شي ناس للي مع رحيلهم الحياة كاملة كاتغير حتى حاجة ماكايبقى عندها نفس اللون ولا نفس المذاق

كل واحد جرب شي نوع من الفراق للي وجعو بزاف و بكاه و ممكن يكون كسرو و بدلو ولكن فقط الناس للي فقدو الوالدين أو أحدهما الي عرفوني علامن كانهضر من الاول

الفراق صعب  و أصعب فراق هو الموت فما بالك بموت أحد الوالدين

واخا كانهضرو على الموت واخا كانشوفوها كاتاخد الناس من حولنا ولكن ماكانحسو بحرقتها و مرارتها حتى تاخد لينا أعز ماعندنا

صعيب بزاف تقبل الموت رغم قوة الايمان ورغم كل شيء ماعمرنا نكونو مهيئين نفسيا للموت

أول مشكلة كاتواجهك هي داك السؤال ديال واش صافي ماباقيش غادي نعاود تشوفو او تشوفها؟

كيفاش غادي نعيش كل تلك الأشياء للي كانعيشها معاه او معاها بلا بيه

علاش مشى دابا

وتستمر التساؤلات حتى كايوجعك راسك

كنت كانحلم نعيش معاه كل تفاصيل حياتنا،كنت كانتخايلو شيخ كولو تجاعيد و مازالا عندو ديك الضحكة للي كانت كاتعجب كل واحد كايعرفو

كنت كانقول وعكة صحية وغادي دوز و يخرج منها أقوى من الأول حيت كان عندي أمل كبير وحيت دايما كان قوي لدرجة أنه ربى بنت راسها قاصح وعلمها ان المرأة قوية لاحقاش هي مرأة ماشي حتى يقويها راجل علمها بزاف ديال الحجات للي كاتفكرهم كل نهار و كاينفعوها كل نهار

كان عندي أمل أنني غادي نعاود نعنقو و نعاود  نشم ريحتو كلما ضاقت بيا الدنيا ماكنتش عارفة ان كولشي ممكن يتغير بين ليلة و ضحاها ماكنتش عارفة ان الحياة غدارة وقاسية لهاد الدرجة

الحمد لله أنني كنت كانحاول ندوز معاه أكثر وقت ممكن و إلا كان غادي يكون ندم قاتل

ماعمري شبعت منو و حتى كون بقا معايا العمر كامل ماعمري كنت نشبع منو

كاين الناس للي قالو ليا انه أعطاني كم من الحب يكفيني حياتي كاملة مايمكنش ننكر انه غمرني بالحب من نهار جيت للدنيا لكن هدا مايعنيش انني شبعت منو

كانشتاق ليه فكل دقيقة و كل نهار كانزيد نشتاق ليه و نحس شحال محتاجة ليه

هادشي كامل باش نقولكم تهلاو فوالديكم وفكاع الناس للي عزاز عليكم المشاكل للي كاتخليكم تبعدو عليهم مايستاهلوش حتى حاجة ماتستاهل تضيعو الوقت القصير للي كاتعيشوه معاهم

بزاف ديال الشباب عندهم مشاكل مع والديهم داكشي ديال صراع الاجيال و اختلاف الثقافات و إلخ

ولكن ماخاصكومش تحيدو من بالكم انه لا أحد على وجه الأرض ممكن يبغيك و يبغي ليك الخير أكتر من والديك تهلى فيهم و قولهم شحال كاتبغيهم